Fylkesmannen i Sogn og Fjordane

Fylkesmannen er statens representant i fylket, og har ansvar for å følgje opp vedtak, mål og retningslinjer frå Stortinget og Regjeringa. Vi har ansvar for oppgåver knytt til helse- og sosialområdet, kommunal forvaltning, samfunnstryggleik, miljøvern, barn og familie, utdanning og barnehage og landbruk. Vi utfører oppgåvene våre gjennom saksbehandling, rettleiing, tilsyn og utviklingsarbeid.

Fylkesmannen i Sogn og Fjordane har vel 120 tilsette som er organisert i fem avdelingar. Vi held til på Leikanger, der vi er lokalisert på Statens hus Sogn og Fjordane saman med skatteetaten og Riksrevisjonen. Landbruksavdelinga vår held til i Førde.

Fylkesmannen i Sogn og Fjordane har lagt vekt på å utvikle og ta i bruk IKT-løysingar som gjer at vi kan løyse oppgåvene våre meir effektivt. Fleire av løysingane våre er tekne i bruk også av andre.