Firmanavn

Fagstilling i sosiologi

Høgskulen med sine 3000 studentar og 300 tilsette kan tilby eit spennande fagmiljø innanfor utdanning og forsking. Høgskulen har studietilbod i Sogndal og i Førde der Sogndal er største studiestaden med ca 80% av studentane og høgskulen sin fellesadministrasjon.

Ledig vikariat fagstilling i sosiologi

Ved Høgskulen i Sogn og Fjordane blir det ledig eit vikariat som førsteamanuensis/ førstelektor/ høgskulelektor i sosiologi i tida 1.4.2010 til 31.3.2011. Stillinga er organisatorisk knytt til Avdeling for samfunnsfag i Sogndal.

Velkomen til ein spennande arbeidsplass!
Vi kan tilby deg ein fagleg utfordrande jobb med engasjerte kollegaer i eit spennande fagmiljø. Vi ønskjer deg velkommen som søkjar!

Avdeling for samfunnsfag tilbyr bachelor i barnevern, sosialt arbeid, vernepleie, sosiologi og historie, og årsstudium i samfunnsfag, ungdomssosiologi og jus. Vi tilbyr fleire vidareutdanningar og det vert arbeidd kontinuerleg med å utvikle nye kurs- og utdanningstilbod, gjerne i samarbeid med eksterne partar. Avdelinga har om lag 500 studentar, 30 fagstillingar og 3 administrative stillingar, og samarbeider aktivt med andre fagmiljø ved HSF. Profesjonsforsking er eit utpeikt satsingsområde ved høgskulen som avdelinga har ansvaret for.

Arbeids- og ansvarsområde
Til stillinga ligg det undervisning, forsking og utviklingsarbeid primært knytt til sosialarbeidarutdanningane. Den som blir tilsett i stillinga kan også få oppgåver ved andre bachelorutdanningar og knytt til høgskulens arbeid med å etablere vidareutdanningar og studium på masternivå.

Kvalifikasjonar
Du må ha hovudfag/mastergrad i sosiologi eller tilsvarande utdanning frå norske eller utanlandske universitet. Det er ønskjeleg med dokumentert vitskapleg kompetanse utover hovudfagsnivå/mastergradsnivå. Ved tilsetjing vert det lagt vekt på formell kompetanse,
undervisningserfaring, yrkeserfaring, dokumentert forskingsinnsats og personlege
eigenskapar.

For tilsetjing som førsteamanuensis er krava norsk doktorgrad/eller tilsvarande eller vitskapleg kompetanse på tilsvarande nivå. For tilsetjing som førstelektor er krava kvalifikasjonar som samla er på nivå med førsteamanuensis, men vurderinga vil byggja på eit breiare grunnlag. For tilsetjing som høgskulelektor er krava eksamen av høgare grad frå universitet eller høgskule. Utdanning tatt utanfor Noreg, skal vere godkjent og stadfesta.

Tilsetjingsvilkår
Stillinga er lønt etter Statens lønsregulativ førsteamanuensis/førstelektor frå kr. 438 700 til kr. 558 000, høgskulelektor kr. 361 500 til kr. 527 800, plassert etter ansiennitet og kompetanse. Frå brutto løn vert trekt lovfesta innskot til Statens pensjonskasse.

Staten har som eit personalpolitisk mål å oppnå ei balansert alders- og kjønnssamansetjing og rekruttere personar med innvandrarbakgrunn. Personar med innvandrarbakgrunn vert oppfordra til å søkje. Høgskulen praktiserer moderat kjønnskvotering. Arbeidsspråket er norsk.

Tilsetjinga skjer på dei vilkår som følgjer av Lov om statens tenestemenn og det reglementet som til ei kvar tid gjeld for høgskulen.

Meir informasjon får du hjå dekan Gunnar Yttri, tlf 57 67 62 42/97 71 09 06, e-post: gunnar.yttri@hisf.no eller studieleiar i barnevern, Torkjell Sollesnes, tlf. 57 67 62 03, e-post: torkjell.sollesnes@hisf.no.

Vi ber om at søknaden vert levert elektronisk ved å fylle ut søknadsskjemaet som du finn på Jobbnorge. Vi ber også om at du gir opp referansar i søknaden.

Søknadsfrist 8. februar 2010.

Søknaden skal gje eit fullstendig oversyn over utdanning og tidlegare praksis, liste over vitskaplege arbeid, og vere vedlagt rettkjende kopiar av vitnemål og attestar. Søknaden med vedlegg og vitskaplege arbeid, alt i 3 komplette og sorterte eksemplar, skal sendast til Høgskulen i Sogn og Fjordane, boks 131, 6851 Sogndal. Vi ber søkjar merke søknadspapira med vikariat fagstilling i sosiologi og vise til elektronisk søknad.