Nyheiter

Lettvint kvardag og bratt moro i Sogn

publisert 09.02.2012 av Redaksjonen

Etter halvtanna år med gode jobbar, ein lettvint familiekvardag og ein stadig større veneflokk i friluftsmiljøet vert tanken på ei permanent framtid i saftbygda stadig meir freistande.

Foto: Privat.

FAKTA: Kristian Losnegard Karlsen Sivilingeniør i industriell økonomi og teknologileiing frå NTNU. Tilsett i Sogndal kommune som Tenesteleiar kommunalteknikk. Ansvar for drift, vedlikehald og utvikling av kommunale vegar, bygg, eigedom (til dømes parkar) og vass- og avløpsystem. Om lag 40 tilsette og 30 årsverk. 5 ingeniørstillingar, resten fagarbeidarar. Torun Emma Torheim Master i geografi med fordjuping i naturressursforvaltning frå NTNU. Tilsett i Sogndal kommune som arealplanleggar i tenesteområdet Plan og næring. Avdelinga har ansvar for plan- og byggesakshandsaming (herunder overordna planlegging og arealplanlegging) kart og oppmåling, næringsarbeid med landbruk, vilt- og fiskeforvaltning, miljøsaker, handsaming av saker etter fleire særlover, m.a. jord- og konsesjonslovverket og forureiningslova. Lenkjer: Sogn Regionråd Sogndal kommune Fjellsportfestivalen Møt Sogn Regionråd på Framtidsfylket Karrieremesser i Bergen 15. februar og Trondheim 1. mars 2012. Meld deg på.

Sivilingeniør Kristian Losnegard Karlsen (32) og geograf Torun Emma Torheim (27) tok  hausten 2010 steget frå Trondheim til Sogndal.

Kristian jobbar som leiar for kommunalteknikk i Sogndal kommune, der han er leiar for om lag 40 personar som steller med drift, vedlikehald og utvikling av bygningar, vegar og vass- og avløpssystema i kommunen.

– Kvardagen som leiar i kommunen er variert og spennande, og eg balanserer mellom ulike behov og ønskje; medarbeidarar, leiarar, politikarar og innbyggjarar. Eg får i stor grad vere med å påvirke viktige område i samfunnet, seier Kristian.

Også Torun  er tilsett i kommunen, på eininga Plan og næring, der ho jobbar med areal- og kommuneplanlegging.

– Som geograf er eg spesielt oppteken av å sjå samanhengane i samfunnet. I jobben som planleggar har eg ein god balanse mellom konkrete arbeidsoppgaver og meir komplekse prosessar og problemstillingar i skjeringspunktet mellom politikar- og innbyggarinteresser og statlege/regionale krav og føringar, seier Torun.

Karrieremessig er begge samstemde i at utviklingsmoglegheitene er gode, med rom for både tid til eigenutvikling og ein fleksibel arbeidssituasjon.

Familievennleg kvardag

Med ei dotter på to år er sambuarparet naturleg nok også svært opptekne av bu- og oppvekstvilkåra i bygda.

– Å bu her er heilt fantastisk i kvardagen. Alt er nært i Sogndal; barnehage, jobb, vener. Vi er uavhengige av bil og buss, og det er mange spennande møteplassar og sosiale arenaer som gjer det lettvint å kome i kontakt med andre, seier Kristian.

Sambuarparet legg ikkje skjul på at avstand til familie og vener andre stader i landet av og til tider kan vere utfordrande:
– Det kan vere litt kronglete når vi skal på besøk utanfor Sogn og Fjordane. Spesielt vinterstid, med stengde vegar og fjellovergangar. Men vi tykkjer likevel at tida vi sparar på ein smidig kvardag veg opp mot det å køyre litt lengre innimellom, seier Torun.

Fjellsportmiljøet: Døropnar for tilflyttarane

I Sogndal er det eit godt miljø for aktive personar og familiar, med mange frilufts- og ekstremsportinteresserte, og Kristian og Torun nemner spesielt klatreklubben og klatreveggen på Campus Fosshaugane som ein viktig døropnar for tilflyttarane.

Fjellsportfestivalen tilbyr unike fjellsportopplevingar for både tilreisande og fastbuande, og vert arrangert som eit gedigent dugnadsarbeid. Både innbarka sogningar, unge nytilflyttarar og ivrige studentar stiller opp.

– Folk som kjenner seg att i oss bør heilt klart ta seg ein tur hit. Gjerne under Fjellsportfestivalen, avsluttar Kristian Losnegard Karlsen.

Del denne artikkelen:

Gå tilbake til nyheitssida