Næringslivet i Sunnfjord har landets beste lønsemd
Dei tre siste åra har Sogn og Fjordane teke lange skritt oppover på lista, medan kommunar som Flora, Førde, Stryn og Sogndal er blant dei 20 beste kommunane i årets NæringsNM.
FØRDE: Næringslivsutsyn frå Viefjellet. (Foto: Arild Nybø, mediebruket.no)
Næringslivet i Sunnfjord hadde den beste lønsemda av alle regionane i Norge i 2009, fulgt av Ryfylke og Stavangerregionen. Og Nordfjord er med si plassering på sjuande plass blant dei ti mest lønsame for første gong.
Det er ein av konklusjonane i rapporten til Telemarksforsking som for sjuande gong har utarbeidd NæringsNM for NHO. NæringsNM måler og samanliknar næringsutviklinga i regionar og kommunar, basert på vekst og lønsemd i bedriftene.
Vestlandet dominerer NæringsNM meir enn nokon gong tidlegare, og spesielt Sogn og Fjordane. Innan vekst i regionane er HAFS (Ytre Sogn og sørlege Ytre Sunnfjord) på 5. plass, medan Sunnfjord kjem på den neste plassen.
Når alle kriteria for vekst og lønsemd er lagt saman hamnar Sunnfjord på 3. plass i NæringsNM for regionar, etter Stavangerregionen og Trondheimsregionen.
Flora på andreplass
Sola i Rogaland vann Nærings-NM for kommunar, og Flora i Sunnfjord i Sogn og Fjordane kom på andreplass. Sogndal og Stryn er blant kommunane som utmerkar seg med sterk framgang.
Når ein ser på lønsemda isolert sett er lista slik: Førde 8. plass, Sogndal 11. plass, Flora 13. plass og Stryn 17. plass.
Sjumilssteg for fylket
Fylket Sogn og Fjordane utmerkar seg ved å ta sjumilssteg framover på lista. I NæringsNM for fylka kom Sogn og Fjordane for 2009 på femte plass, sjølv om fylket er tredje dårlegast av nitten når ein ser på næringsutviklinga dei siste ti åra. Fylket var på sisteplass i 2001, og nest sist i 2002 til 2004.
Framgangen føyer seg inn i mønsteret med framgang for Vestlandet dei siste tre åra.
Kommentarer på artikkelen “Næringslivet i Sunnfjord har landets beste lønsemd”
Skriv din kommentar