Birk Tangen

Nyheiter

Birk ønsker kollegaer til teknologileir

Med mål om å inspirere fleire til å velje teknologi- og industrifag, arrangerer Birk teknologileir. No treng han kollegaer.

Birk Tangen (25) er sjølv førsteårsstudent ved informasjonsteknologilinja på HVL i Førde. Ved sidan av studiar jobbar han deltid med å drifte teknologiprosjekt for Pro Vestland opplæringskontor.

– Arbeidslivet har behov for at fleire vel teknologi- og industrifag. Derfor ønsker vi å få opp interessa for desse faga hos ungdomsskuleelevar, forklarar han.

Engasjerte ungdommar på pilotprosjekt

I fjor gjennomførte han ein pilotleir, der niande- og tiandeklassingar fekk demontere gamle høgtalarar, før dei skulle designe, 3D-printe og montere sin eigen bluetooth-høgtalar.

– Teknologileir er ein unik moglegheit for ungdom som vil utforske tekniske fag på ein kjekk måte. Ungdommane var både engasjerte og nysgjerrige, og det verka som dei likte kombinasjonen av gøy og utfordrande.

"Det viktigaste er at engasjementet ditt smittar"

Teknologileir

Ser etter deg med engasjement som smittar

For å planlegge og gjennomføre sommarens teknologileirar, ønsker Birk ein kollega.

– Det er mange elevar å følge opp, og derfor treng vi fleire som kan jobbe på teknologileirane. Vi er ute etter nokon med praktisk kompetanse innan teknologi.

– Kva med det pedagogiske?

– Om du har interesse og engasjement for faget, kjem pedagogikken av seg sjølv. Det viktigaste er at engasjementet ditt smittar, smiler Birk.

Nyttig og kul erfaring

Birk har sjølv opparbeida seg erfaring som han tek med seg vidare i arbeidslivet.

– Eg har lært masse av å vere leiar på teknologileir. Å planlegge og gjennomføre eit slikt prosjekt, samtidig som du får jobbe med ungdommar, har gitt meg ny kompetanse som kan bli nyttig i arbeidslivet.

I tillegg er det jo veldig kjekt:

– Saman med ungdommane får du vere kreativ, løyse tekniske utfordringar og skape kul teknologi. Og så er det eit pluss at du får reise litt i Vestland.

Har du lyst til å jobbe på teknologileir? Kontakt PRO Vestland Opplæringskontor: Du sender søknaden til post@pro.sf.no eller ringer Jorunn Kirketeig på mobil 91144966.

Fleire saker